మీ ఓట్లప్పుడు మాత్రమే. रावण.MD

ఏ కులము బాబు మీది ?

“దళితులము సార్”

అంటే దేనిలో వస్తారు ?

"గుడిమెట్లను ఎక్కనివ్వని వారిలో ,

ఇంటి గుమ్మం దాటినివ్వని వారిలో,

తిట్లను-బెదిరింపులను భరించేవాళ్ళలో ,

సపరేటు ప్లేటు ఎడ్ల సావిట్లో పెట్టించుకునేవారిలో సార్".

నేనేమో హిందువులలో వస్తావని అనుకున్నా!!

వస్తానుగా సార్ కానీ మీ ఓట్లప్పుడు మాత్రమే.

అట్లే ఏం తింటుంటారు బాబు ?

“ఒక దళితుడు తినేది తింటాను సార్”

అది కాదు అంటే ఏమేమి  తింటుంటారు ?

మీలాంటి పెద్దల , రెడ్ల, ఊరి పెద్దమనుషుల దగ్గర తిట్లు ,

పేదోళ్ల ఇంట్లో దొరికే రొట్టె- కారం ,

అప్పుడప్పుడు వరిబువ్వ-ఉత్తపప్పు తింటుంటాం సార్.

నేనేమో  చికెన్ ,మటన్, పన్నీరు తింటుంటారేమో  అనుకున్నా…!

అవి కూడా తింటూంటాను సార్ కానీ మీ ఓట్లప్పుడు మాత్రమే.

మరి ఏమేమి తాగుతుంటారు బాబు ?

“ ఓ దళితుడు  తాగేది తాగుతుంటాను సార్!”

అవే ఏమేమి తాగుతుంటారు?

అంటరానివాళ్ళమనే దుఃఖాన్ని,

ఆశలు-ఆశయాలను చంపుకున్న బాధలను మింగుతూ ఉంటాం సార్ .

నేనేమో కల్లు, సారాయి, బీరు, కోటరు తాగుతుంటారని అనుకున్నా.. !

అవి కూడా తాగుతాను సార్ కానీ మీ ఓట్లప్పుడు మాత్రమే …

                                 -   MAHADEV.M.CH