సంతోషాల ఉగాది నిచ్చే తల్లి , నా తెలుగు తల్లి - మహాదేవుడు చిన్న.M

 సంతోషాల ఉగాది నిచ్చే తల్లి , నా తెలుగు తల్లి

పచ్చని సొగసుల పరిమళాలతో,

వసంత కోకిల తీయని రాగాలతో ,

ఉదయించే కొత్త కాంతులతో,

ఇంటింటి పండుగ శోభలతో,

పిల్లల ఆట పాటలతో,

మదినిండి ఆనందాలతో,

పంచాంగ శ్రావణాలతో ,

సంతోషాల ఉగాదినిచ్చే తల్లి ,

నా తెలుగు తల్లి ..

ఉయ్యాల ఊగులతో,

తెల్ల అంచు పంచలతో ,

భుజం మీది కండువాలతో ,

తెలుగు తేజస్సు హంగులతో ,

మన ఆదర్శ కట్టులతో ,

అమ్మతన బొట్టులతో ,

చిరు వేప పువ్వులతో ,

ముద్దబంతి నవ్వులతో ,

మామిడి తోరణాలతో ,

సంతోషాల ఉగాదినిచ్చే తల్లి ,

నా తెలుగు తల్లి ….

ఆడపడుచుల చిరునవ్వులతో ,

బంధుమిత్రుల పలకరింపులతో ,

ఆరు రుచుల ఉగాదిపచ్చడి లతో ,

వంటింటి గుబాళింపులతో ,

ఇంటిల్లిపాది సంతోషాలతో ,

సంతోషాల ఉగాదినిచ్చే తల్లి ,

నా తెలుగు తల్లి ……

పొలము ను దుక్కి దున్నే నాగళ్ళతో ,

పుడమితల్లి పలకరింపులతో ,

రైతన్న చెమట చిరుజల్లులతో ,

కొత్త సాగుల మొదలు తో ,

పలికే రామచిలుక లతో,

కులికే రాజహంస లతో ,

సాహిత్య - సాంస్కృతిక కార్యక్రమాలతో ,

అంబరాన్ని తాకే సంబరాలతో ,

మానవాళిని ఒక్కటిగా కలిపే ,

తెలుగు నామ సంవత్సర మొదటి రోజు గా ,

సంతోషాల ఉగాదినిచ్చే తల్లి ,

నా తెలుగు తల్లి………

                                                                                          - మహాదేవ్